Di quannu si staccau du continenti
stu pezzu di tirrenu nmenzu mari
canciava nomu a sicunnu li genti
chi vinniru cca sutta a cumannari.

Greci, rumani, arabi, normanni,
angiuini, spagnoli e borboni
si dettiru lu canciu cu li anni
lassannu cosi tinti e cosi buoni.

Pi tutti li putenti chi canciaru
lu studiu fattu, fui fattu nvanu,
e iunciri sta terra cu ddu faru,
paria vicinu, inveci era luntanu.

Nuddu di li studiusi di ddi tempi,
fici li fatti di nzocch’avia nmenti,
sulu carti, purtaru, comu esempi
senza iuncilla mai cu continenti.

Passarinu tanti anni e alla fini
vinni lu tempu da tecnologia
li cassi di partiti fuoru chini
di sordi pi lu ponti, e così sia.

Ci fui ddu pulitici di milanu
chi di la so onestà si nni vantava,
nto nnenti divintau sicilianu
quannu scupreru chi iddu rubava.

P’un certu tempu nun si nni parlau,
s’eppi a sistimari la partita.
Cu fui galera e cu si nni scappau
vannu accussì li fatti di la vita.

Tuttu ricuminciau cu l’occasioni
di scegliri nto guvernu cu mannari,
Rutelli o puramenti Berlusconi,
cci iu..cu megghiu la seppi cuntari.

Assecunnu lu mumentu nni cuntava
chiddu c’avia fattu nto passatu,
scutannulu, la genti s’incantava
e a la fini..si visti u risurtatu.

Cchianau, e alla fini di la storia
nta Vespa, chi cci fici di cumpari,
firmau na carta e cu tanta boria,
strati e ponti si misi a disignari.

Cusapi si si iuncinu li spunni
e si lu ponti passerà lu mari
cu st’autru eroi di ddu munni,
chi tutti li mistieri sapi fari.