Erinu tutti stissi li iurnati.
O nto cafè o dintra a società
iucannu e carti e cuntannu minchiati,
spittannu a seggia di cu sinni và.

Ogni tantu si sintia na uciata
di chiddu chi dirigi la partita
a lu cumpagnu chi sbagghiau iucata
e chi ci rialau la vinciuta

Ppuiati cu li piedi nto cunchieri
c’erinu quasi tutti i vicchiarieddi,
cuntannu fatti chi nun su di ieri,
ma di quannu erinu picciuttieddi.

E li carusi mustravinu attinzioni
si quarcunu parlava di la verra,
iurava ch’era veru e no finzioni
vidiri li cumpagni muorti nterra.

Lu fattu si cuntava cu passioni
e l’interessamentu era tantu,
tutti però pruvavunu emozioni,
e pi corcunu puru quarchi chiantu.

Li stessi fatti viniennu riurdati
di vicchiarieddi tutti li nvirnati,
e puru si su fatti ripituti,
passavinu lu stissu li iurnati.