“Cummogghiti chi hai li manu friddi”
ci dicia la mamma a lu carusu
“nun vidi comu cadinu l’acieddi
chi di la fami lassinu u purtusu.

Certi matini cu ddu ran purvinu,
si raccumannava prima di la scola,
nta la nivi si paria un pinguinu
cu scapularu e li scarpi di sola.

Lu vidia tracuddari cu emozioni
di nta dda cantunera chi si vidi
aspittava a fini di lezioni
pi vidimi si chianci oppuri ridi.

Quannu tutta la notti pagghiazzava
e la matina c’era tanta nivi
ogni carusu di chistu si priava
pirchì di nta la casa un ti muvivi.

E si lu ventu friddu tuttu gghilava,
c’era macari tanta cuntintizza
cu mittia fora lu nasu sciddicava
lu malutempu… o chi ran biddizza.

Li ranni annu iautru a cui pinzari
cu ia campagna e cu era mpiegatu
erinu li suli chi si vidiennu passari
quadiannu lu cristallu cu lu ciatu.