E duormu! Anzi ciumu!
i piedi puiati nto cunchieri,
a pipa ch’ogni tanto ietta fumu
e annegghia tutti li pinzieri.

U luci, chi prima era raggiatu,
cumincia divintari cinnirusu.
Tanti riuordi di pani caliatu,
di quannu erivi carusu.

Pinzeri di tutti li culuri
chi capitinu duranti lu tragittu;
sempri si penza a lu primamuri
cuomu si penza a lu luttu strittu.

Lu fuocu chi svampau nto nenti!
A conca s’incumincia sbacantari,
assumigghia a la vita di la genti:
c’un si nna duna di lu so passari!