Quannu vidia passari li cavaddi,
caricati di ligna pi lu pani
o di viertuli e visazzi o di cancieddi,
cu la crapa rinnata e corchi cani.

Si lu caricu nun’era pisanti,
cavarcavinu macari li viddani,
cun carusieddu mittutu davanti,
assumigghiannu a pupiddi siciliani.

Si l’erba frisca pui vinia mituta,
si carricava chidda pa nuttata,
li carusi nni rubammu na ranfata,
e fari li trummetti, pi na sunata.

Quarchi vota un carusu, du disiu,
ci dumannava “micci metti ncruppa”,
nta lu bisuognu lu chiamammu “ziu”,
puru si a parintera eni strippa.

Ogni tantu l’invitu era ccittatu,
di corcadunu chi navia primura,
di dda passiata ognunu era priatu,
e di turnari arreri un vidia l’ura.