A crisi di l'acqua

di Al Gio e Gia
Cu tutti sti peni e sti disgrazzi,
ni mancava sulu chidda di l'acqua a Capizzi;

cu l'acqua correnti n'aviammu bbituatu,
e ormai tutti i vaschi n'aviammu luatu;

quannu nna l'autri paisi,
si lamintavanu chi aviannu a crisi;

a Capizzi ni faciammu na bedda risata,
e era pronta macari a sarsiata;

ni sintiammu o sicuru di chidda chi niscia di nne massi,
tantu chi cu tutta ssa iacqua faciammu feddi rassi;

nu passaru ne ianni ne misi,
chi macari a Capizzi ci fui a crisi;

mi fannu rriurdari intra nna mia,
chi almenu avia 40 anni chi nun c'era ssa caristia;

l'acqua si perdi ne nostri muntagni,
pi causa chi attuarnu ci su tanti macagni;

si ccuntentinu chi ni duninu l'acqua lorda di troina,
cchiù tuastu di vvirsari a nostra chi eni genuina;

a l'acqualuori ci veni a riminuni quannu gghiorna a matina,
s'annu a ssuppari i iastimi di genti e du cumuni a solita romanzina;

o cumuni hannu fattu u iuacu di carusi,
nun passa assai chi na duninu na ota o misi;

in compensu i putiara su tutti priati,
chi si cci carriaru tutta l'acqua comu e raggiati;

ormai chi simu tutti scannaliati,
amu misu vaschi macari ne ngnunati;

cu nun iavi spaziu mancu nte canali,
si fa mettiri i vaschi ne rampi di scali;

all'urtimu ama a fari na bedda considerazioni,
un forti applausu pi sti disaggi, va all'amministrazioni;

siccuamu nun c'è nenti chi rattari,
ni lassaru senza iacqua a n'amu a rassignari.