Spittannu chi quagghiava da ranita,
chi Pippinu Fumettu travagghiava,
e ca primura di fari na surbata
sputazza, du disiu, mi cuddava.

Mastru Pippinu Fumettu pi li festi
si mittia, pi l’occasioni, nta carcara,
na società di gintuzzi onesti
viddani, mitatieri e carbunara.

Da intra tinia tanta nivi pistata,
nta fossa d’inviernu, di li so parenti,
a mittia nto ntinu, e na pignata
a girava a manu, e no ca currenti.

Zucchiru, limuni e acqua era a mistura,
chi so mugghieri prima priparava
la dosi avia adessiri cu misura
senò a ranitedda nun quagghiava.

Di carusieddi cci nni iemmu a frotta
e ognunu, cu na scusa, avia primura
pi spiritu ci diciemmu “chianau a ricotta”,
o datimi ssa ranita puru s’è dura.

Li mammi nni diciennu cu fiziuni,
“nta mastru Pippinu tu millaccattari
ugniri nta Pippinuliddu o nta Mamuni
pirchi chisticcà sunnu chiù cari”.

Cu sa purtava pi intra, savia a purtari
na scutedda o na cavetta o nu bicchieri
ancora a plastica lavianu a nvintari,
e chiddu di mastru Pippinu nun turnava arrieri.

So figghiu Giacuminu era u cassieri,
inchia i bicchera e duoppu li lavava
nto quadaruni, cavia inchiutu ieri
e tra na para i iorna l’acqua canciava.