A Cannedda

di Al Gio e Gia
Chi brutta fini chi fici a cannedda,
primi si cci ìa cu varduni e ora ca sedda;

a vera missioni era chidda du pellegrinaggiu,
e tanti c'iannu scausi pi farici u viaggiu;

prima c'iammu tutti chi scecchi e chi muli,
ora di chissi rristaru quattru iatti suli;

si vidunu sulu cavaddi di razza.
senza crapistu e senza visazza;

c'è cu si ccatta na imenta sulu pi ssa occasioni,
pi sintirisi ranni e fari a sa presentazioni;

sulu a ccussì a capizzi pensa di cuntari,
di essiri masculu e putirisi nnacari;

appena finisci a ntrata si l'ava a svinniri,
pirchì nun avi tirrenu unna a teniri;

i cavallerizzi quannu scinninu su tutti cacati,
su vestuti di sceriffi e parinu comu i babbi priati;

ssi quattru caini cu sa maladucazioni,
ficiru speddiri na bella tradizioni;

quannu imu a codda pi taliari a ntrata,
tutti spiramu nta na bedda truata;

spittamu chi corcunu va cadiannu,
pi farini i cianchi tanti e imu rridiannu;

É inutili chi vi nnacati,
cu ssi cavaddi chi vi ccattati;

sulu un partitu a cannedda a sapi organizzari,
su chiddi chi muli bardati chiamati urdunari.