U Muru

Stu muru mi pari cuomu 'ddi famigghi
cu ridi pun’ura e cu ietta li schigghi
cu sbatti a porta e cu resta mpalatu
cu dici ncivili e maladucatu

cu trasi ogni tantu e dici la sua
cu scherza pisanti e cu lassa a poesia
cu iavi vintanni e cu n'avi cinquanta
cu scuta liggiennu e mutu sa chianta

Ma spissu macari 'nte miegghi succiedi
quannu li figghi pigghiunu piedi
la famigghia crisci, la scerra è pisanti
cu oli la terra e cu oli diamanti

Quannu li patri nun sannu chi fari
cuomu spartirisi p’un fari sciarriari
quannu li matri nun dormunu a notti
e preiunu u Signuri mi ferma li lotti

Poi la preiera nun pari scutata
pi sempri a famigghia resta sciarriata
li frati si spartunu ma lu sangu li teni
e dintra d’iddi è cchiù ranni lu beni

Nun c'è lu nutaru chi sparti lu sangu
macari sa ucca fa nesciri fangu
rrivu e mi spiegu ccussì mi capiti
sennò passati stu scrittu e vi'nni iti

chiddu chi dicu e duocu vi lassu
è chi ntà famigghia è ruossu u matassu
di stissu ntra niautri lu beni iavimu
e di chiù assai ch’un ni canuscimu

manca na cosa chi c’è nta famigghia
ora va dicu e cu a oli sa pigghia
si la famigghia iavi terra e spartenza
'nta stu cimientu nun vidu simenza