Quant'è bedda Maria si la sapiti,
chidda chi va firriannu pi li strati,
ci spiennu li ggenti: o Vui c'aviti?
Aiu u ma figghiu ammienzu a li ddannati
nsignatimi la via si la sapiti!

-Pigghia o sangu, sangu;
è dda la strata,
e, ssi ppi sorti, nu la cannusciti,
iti o monti Carvaniu, è dda la strata.
Ffacciativi Sarvaturi!
Ffaccia, ffaccia!

Cca c'è to Matri chi ti vò vidiri.
Binidicitimi Matri e otivinni!
Lu primu cuorpu a la Cruci vidiennu,
quannu a Ggesuzzu lu pigghiaru
lu spugghiaru e lu ttaccaru
cu la facci a strascinuni
ìa gridannu a uci forti.

E Maria darrieri i porti
chi ssintia li scurriati:
Adaciu, adaciu, un' tantu forti!
Su carnuzzi delicati.

-Zitta,zitta o tu Maria
o lassu a Ggesù e pigghiu a ttia!
-Baraffè c'a mmia pigghiassivu
e o ma figghiu mi lassassivu!
Priestu lucissi luna, mi mittissi a camminari,
caminannu caminannu, forsi Ggiuda mi ncuntrassi!
O Ggiuda tradituri chi o ma figghiu ti vinnisti!

E pi trenta dinari!
Suddu ievvi nna Maddalena
n'autru tantu ti nni dava!
Si dinari nu nn'avia,
ricchi palazzi si vinnia.
Si vinievvi pi nna mia
n'autru tantu ti nni dava!
Si dinari nu nn'avia,
u velu di ntesta mi vinnia!